Selami: Nuk ka se çka të kursehet nga xhepi i zbrazët

Ilmi Selami

Nga xhepi i zbrazët - në xhep të zbrazët, nuk mund të kursehet e as të bëhet tjetërsim i fondeve. Kjo është përgjigjja e kryetarit të komisionit shtetëror për anti-korrupsion Ilmi Selami, drejtuar ministrit të financave Zoran Stavreski, i cili këtij komisioni i kishte rekomanduar të kursej. Megjithatë Selami u shpreh i gatshëm që në 4 muajt e ardhshëm anëtarët e komisionit të punojnë pa rroga nëse ministria e financave jep arsyetim i cili mban. Ndërsa i menjëhershëm ka qenë reagimi i ministrisë së financave e cila thotë se këtij komisioni me rishikimin e buxhetit i janë dhënë 40 për qind më tepër fonde.
“I parashtroj pyetje direke ministrit të financave, se vallë a mund të bëhet tjetërsim i mjeteve nga një xhep i zbrazët në xhepin tjetër të zbrazët”, tha  Ilmi Selami, kryetar i komisionit për Anti-korrupsion.
Numri një i këtij komisioni thotë se është i gatshëm të japë dorëheqje nga posti i kryetarit nëse ai është arsye për të cilën Qeveria ka shkurtuar fondet.
“Pyetje konkrete dhe e vërtet nuk është se unë a do të japë dorëheqje, por pse Ilmi Selami është problemi për Qeverinë e tanishme. A thua vallë pse punon. Këtu duhet të parashtrohet pyetja e vërtetë dhe nëse miret përgjigjja se personat të cilët në këtë shtet punojnë i pengojnë Qeverisë atëherë thjesht mund të kuptojmë pse bëhet ndalimi i mjeteve financiare dhe shkurtimi i mandatit”,  Ilmi Selami, kryetar i komisionit për Anti-korrupsion.
Kryeministri Gruevski ka deklaruar se mbështet profesionalizimin e komisionit për anti-korrupsion, por nuk ka thënë asgjë rreth propozim ndryshimeve tjera në ligjin në sferën e korrupsionit.
“Ndonjëherë ka njerëz që kërkojnë të bësh diçka e më pas kur e bëjmë thonë  pse po e bëjmë, për fat të keq në Maqedoni shumherë ndodh një gjë e tillë por ne shohim çka është mirë të bëjmë e jo si thonë ata”, tha Nikolla Gruevski, kryeministër.
Me ndryshimin e ligjit për anti-korrupsion mandati i anëtarëve të rinj të komisionit do të shkurtohet prej 5 në 4 vjet. Ministria e Drejtësisë ndryshimet e ligjit për anti-korrupsion në rend dite në Qeveri dhe në procedurë parlamentare pritet t’i dërgojë në shtator. Nevzat Mahmuti