Deputetët përplasen për kredinë e FMN-së

Qeveria nuk dëshiron të tregojë saktë se ku do t’i harxhojë, dhe sa kohë do t’i duhet që t’i kthejë 86 milion dollarët, të cilët do t’i merr nga Fondi Monetar Ndërkombëtar (FMN). Deputetët e opozitës pohojnë se ka një muaj që kërkojnë të shohin marrëveshjen për shfrytëzimin e parave, mirëpo ende nuk e kanë marrë.
“Është e qartë se atë marrëveshje po e fshehin, sepse nuk ka asnjë arsye që  të mos dërgohet në Kuvend. Ju mund të merrni përgjegjësi në cilat afate do t’i ktheni, por kjo do të jep sinjal shumë i keq deri tek tregjet komerciale. Sepse shteti nuk është në gjendje të kthej 75 milion euro, dhe kjo padyshim do të ndikoj drejtpërdrejtë në çmimin e huazimit tonë të mundshëm, me obligacione të reja të tregjeve komerciale”, tha Jovan Mansievski, deputet i LDP-së.
“Shumica në komisioni e përfaqësuesve të ministrisë së financave refuzuan të gjitha amendamentet të opozitës. Ministri Stavrevski nuk u  përgjigj se a do tua dorëzoj deputetëve marrëveshjen për shfrytëzimin e parave, por bëri me dije se norma e interesit për kthimin e parave është 0,3 për qind. Demantoi se me këto para do të shlyhen vetëm borxhet”, u shpreh Flora Kadriu, Demokracia e Re.
“Ato mjete do të përdoren për të gjitha shërbimet që kanë të bëjnë me buxhetin. Kjo do të thotë edhe për ato qëllime që i përmendët dhe për projekte të ambientit jetësor në vende të banuara me popullatë maqedonase dhe shqiptare, për rrugët, kanalizimet, ujësjellësit dhe gjithçka tjetër që financohet nga  buxheti”, deklaroi Zoran Stavrevski, ministër i financave. Jane Dimevski