Debat: Nevojitet bashkërendim i politikës fiskale dhe monetare

Pa bashkërendim të politikave monetare dhe fiskale mes Qeverisë dhe Bankës popullore të Maqedonisë, ekonomia e vendit nuk mund të tejkalojë recesionin ekonomik në të cilin ndodhet vendi. Këto janë rezultatet e analizës vjetore të Institutit ekonomik ‘Ohrid’ i cili për çdo vit del me të dhëna rreth zhvillimeve në ekonomi. Profesori Tome Nenovski tha se politika monetare në këtë fazë të recesionit tregon shenja më restriktive e cila drejtpërdrejt ndikon në likuiditetin e subjekteve ekonomike. Sipas tij kjo politikë restriktive ka ngadalësuar aktivitetin e kompanive, ndërsa me këtë edhe mbushjen më të ngadalësuar të buxhetit. 
“Me vëmendje të lartë duhet të ndjekim aktivitetet ekonomike në periudhën e ardhshme, sepse kriza ekonomike në përgjithësi  ende nuk është pas nesh , ajo ende është rreth nesh. Do të duhet të ballafaqohemi me të gjitha sfidat të cilat do t’i  sjellë kriza me vete”, tha Tome Nenovski, ekspert i ekonomisë.
Ndërsa Biljana Janeva thotë se përparimi i ekonomisë në Maqedoni, mund të arrihet vetëm me zgjidhjen e çështjes së Emrit me Greqinë dhe anëtarësimin në NATO.
“Kemi konstatuar se është bërë një hap para pas përfundimit të zgjedhjeve parlamentare në Greqi, ndërsa kontaktet për zgjidhjen e kësaj çështjeje janë intensifikuar pas konstituimit të Qeverisë së re greke, duke iu dhënë një frymë të re bisedimeve”, u shpreh Biljana Janeva, eksperte e ekonomisë.
Instituti ekonomik ‘Ohrid’, në analizën e tij, pozitivisht ka vlerësuar reformat e Qeverisë, në gjyqësi, shëndetësi dhe në transport.

Nevzat Mamuti